檸檬薏米水

夏天又熱又濕，最適合煲檸檬薏米水飲，有時在土司工房食野都會買杯飲吓，但＄18一杯， 如果用來買材料返屋企煲，就成家人都有得飲啦！

材料

材料 :

生熟薏米 4兩 

果皮 1角

水 兩公升

檸檬 1個（ 刨皮榨汁切粒）

冰糖 適量

做法 :

1．先將薏米洗淨和果皮浸約一小時，果皮去瓤

2．薏米連凍水放入煮滾後，慢火煲約一小時

3．洗淨檸檬，切幾片裝飾用，刨皮（黃色部份），盡量不要白色部份（效苦澀），去核，去除果衣，只餘下果肉切粒，有剩可榨汁

4．把檸檬皮及果肉加入煲好的薏米水內， 加冰糖 焗 20 分鐘

5．待涼後加入檸檬拌勻，隔去檸檬皮及薏米，可將薏米水放入雪櫃保存，薏米可留起同吃

薏米有健脾胃、利小便、消水腫、清熱去濕之功效，生薏米較寒，熟薏米不寒，所以我用生熟薏米各一半。而 檸檬能美白，所以適合夏天飲用！

（左）熟薏米；（右）生薏米